असली मसाले सच सच,एमडीएच एमडीएच.’MDH’ हे फक्त नाव नाही तर ती भारताच्या चवीची ओळख आहे.वर्षानुवर्षे MDH चा चेहरा असलेले महाशय धरमपाल गुलाटी आज जगात नाही.त्यांच्या निधनाने संपूर्ण देशावर शोककळा पसरली होती.स्वातंत्र्यानंतर,ते निर्वासित म्हणून भारतात आले आणि गेल्या वर्षी ते IIFL Hurun India Rich २०२० च्या यादीत समाविष्ट केलेले भारतातील सर्वात वृद्ध श्रीमंत व्यक्ती होते.यशाच्या शिखरावरचा त्याचा प्रवास खूप रंजक आहे.
१९२२ मध्ये पाकिस्तानातील सियालकोट येथील एका छोट्या दुकानातून एमडीएचची सुरुवात झाली.त्यांचे वडील महाशय चुन्नीलाल गुलाटी,एमडीएचचे संस्थापक होते.महाशय धरमपाल यांचा जन्म २७ मार्च १९२३ रोजी सियालकोट येथे झाला. १९३३ मध्ये,त्यांनी ५ वी पूर्ण होण्यापूर्वीच शाळा सोडली आणि वडिलांना दुकानात मदत करण्यास सुरुवात केली.त्यानंतर १९४७ मध्ये देशाची फाळणी झाली तेव्हा धर्मपाल गुलाटी कुटुंबासह पाकिस्तानातून भारतात आले.
कुटुंबाने अमृतसरमधील निर्वासित छावणीत काही काळ घालवला,नंतर कामाच्या शोधात दिल्लीला गेले.दिल्लीत कुटुंबाचा उदरनिर्वाह करणे सोपे नव्हते.असे म्हटले जाते की जेव्हा ते भारतात आले तेव्हा त्याच्याकडे फक्त १५०० रुपये शिल्लक होते. त्या पैशातून त्यांनी ६५० रुपयांना एक घोडा आणि टांगा विकत घेतला आणि रेल्वे स्टेशनवर चालवायला सुरुवात केली.
दुकान उघडण्यासाठी पुरेसा पैसा वाचल्यावर त्याने तो टांगा भावाला दिला आणि करोलबाग येथील अजमल खान रोडवर मसाले विकायला सुरुवात केली.धरमपालच्या मसाल्याच्या दुकानाबद्दल,जेव्हा लोकांना कळले की सियालकोटचे देगी मिर्च लोक आता दिल्लीत आहेत,तेव्हा त्यांचा व्यवसाय पसरला.सियालकोटमध्‍ये महाशियान दी हट्टी या नावाने त्यांचा कौटुंबिक व्यवसाय ‘देगी मिर्च वाले’ या नावानेही प्रसिद्ध होता.त्यानंतर १९५३ मध्ये त्यांनी टांगा विकला आणि चांदणी चौकात भाड्याने दुकान घेतले.त्यांनी या दुकानाला महाशिया दी हत्ती (MDH) असे नाव दिले.
१९५९ गुलाटी कुटुंबाने दिल्लीतील कीर्ती नगरमध्ये पहिला मसाल्याचा कारखाना उघडला.यानंतर त्यांनी करोलबाग येथील अजमल खान रोडवर असाच दुसरा कारखाना काढला.१९६० च्या दशकात,MDH हे करोलबागमधील प्रसिद्ध मसाल्यांचे दुकान बनले होते.येथून त्यांचा व्यवसाय वाढू लागला.हळूहळू लोकांना धरमपाल गुलाटीचे मसाले इतके आवडू लागले की ते जगभर निर्यात होऊ लागले.हे मसाले आज १०० हून अधिक देशांमध्ये वापरले जाते.
धरमपाल गुलाटी हे ५४०० कोटींच्या संपत्तीसह IIFL Hurun India Rich २०२० च्या यादीतील भारतातील सर्वात वृद्ध श्रीमंत व्यक्ती होते.या यादीत ते २१६ व्या स्थानावर आहे.युरोमॉनिटरच्या मते,२५ कोटी पगार असलेले धरमपाल गुलाटी एफएमसीजी क्षेत्रातील सर्वाधिक पगार घेणारे सीईओ बनले आहेत.वयाच्या या टप्प्यावरही ते खूप सक्रिय होते आणि एमडीएचच्या कारखान्यात,मार्केटमध्ये आणि डीलरकडे रोज जात.
